Iyadoo xilli dambe oo xalay ah wasaaradda arrimaha gudaha dawladda federaalka Soomaaliya soo saartay bayaan ka dhan ah siyaasadda Axmed-madoobe, ayaa goor dhawayd war-saxaafadeed kasoo baxay Jubbaland lagu shaaciyey inay hakisay wada-shaqayntii ay la lahayd DF-ka Somaliya.
War-saxaafadeedka ayaa lagu sheegay in dawladda federaalku ay hormood ka noqotay hagardaamaynta iyo khal-khal gelinta joogtada ah ee amniga Jubbaland. Waxaana lagu eedeeyey inay si weyn u xagal-daacisay hawl-galladii dagaal ee lagula jiray xoogagga Al-Shabaab.
Bayaankan ay soo saartay Jubbaland ayaa si cad loogu sheegay sida ay ugu fashilantay dagaalladii ay kula jirtay Al-Shabaab, isla markaana ciidamadeedii iyo kuwa dawladda federaalkuba ay dhabarka u jeediyeen kana soo hulleeleen furimaha dagaalka, iyadoo guul-darradaasi u tiirisay kooxda Xasan Gurguurte.
Sidoo kale Jubbaland ayaa bayaankeedan ku caddaysay in dawladda federaalku ay ciidamada ka dhex-bilawday kala fur-fur, isla markaana ka caga-jiidday in ciidamada diidday inay la dagaallamaan Al-Shabaab ay kusoo bedesho ciidan kale oo isku dhaf ah oo buuxiya furimihii lasoo banneeyey.
Maamulka Jubbaland ayaa mar kale ku celiyey isla markaana sheegtay inuu u madax-bannaan yahay qabsashada iyo maamulidda doorashadooda. Iyagoo ka digay in la siyaasadeeyo, si khaldanna loo isticmaallo ciidanka dawladda iyo kuwa ATMIS.
Ilo-wareedyo ayaa sheegaya in xiisaddu ay cirka isku sii shareertay isla markaana dowladda federaalka Soomaaliya codstay in ciidamada ATMIS ee jooga Kismaayo ay la wareegaan amniga garoonka diyaaradaha ee magaalladaasi.
