Madaxweyne Ku Xigeenka maamulka isku magacaabey Somaliland ayaa booqasho ugu tagey Musharraxa Xisbiga Waddani Cabdiraxmaan-Cirro ka dib doorashadii maamulkaasi qabsadey Arbacadii ina dhaaftey.
Saylici ayaa gurigiisa ku booqday Cirro sida ay tebinayso warbaahinta maxalliga ah ee Somaliland.
Madaxweyne Ku Xigeenka maamulkaas ayaa doorashada waxyar ka hor sheegay in uu dhisayo Cabdiraxmaan-Cirro taas oo dhiigbax ku noqotey Muuse Biixi.
Waxa xusid mudan in Saylici uu muddo 14sano ah uu Somaliland madaxweyne ku xigeen ka ahaa.
Dhanka kale wararka saadaasha ah ee ka soo baxaya doorashadii laga qabtey maamulkaas ayaa tibaaxaya in Cirro uu si weyn ugu horreeyo tartanka.
Odorosyada cusub ayaa tilmaamaya in codad kor u dhaafaya 60% uu ku horreeyo Cirro.
Guddida Doorashada ee maamulkaas ayaa hore u sheegay in ay sharcidarro tahay in natiijada lagu baahiyo baraha bulshada.
