Dagaal gaari looga gubay maleeshiyaadka Xasan Gurguurte ayaa xaafado ka tirsan magaalada Muqdisho ku dhex-maray dadka deegaanka iyo askarta dawladda.
Iska hor'imaad culus oo u dhaxeeya maleeshiyaadka dawladda iyo dad hubaysan ayaa ka dhacay qaar ka mid ah xaafadaha magaalada Muqdisho.
Wararka laga helayo xaafadaha Macallin Nuur,Jaamacadda illaa iyo Ex.Control Afgooye ayaa sheegaya in halkaas laga maqlayo jugta madaafiic iyo rasaas lays dhaafsanayo.
Iska hor'imaadka ayaa billaawday maanta barqadii kadib markii ay rag hubaysan madfac RPG ah ku dhufteen cagaftii Xasan Gurguurte ee caanka ku aheyd burburinta guryaha shacabka kadibna waxaa billaawday iska hor'imaad culus.
Goob-joogayaal ayaa sheegay in maleeshiyaad gurmad ah oo ciidanka dawladda ka tirsan ay dagaalka ku biireen halka dhalinyaro hubaysan ay iyana dagaalka kusoo biireen.
Dhul-boobka kooxda Villa Somaliya ay ka waddo degmooyin ka tirsan gobolka Banaadir ayaa dhaliyay xiisad colaadeed, waxaanay maanta ay dadweynuhu sameeyeen gadood xooggan oo ay kaga hor-tageen.
