Saxafiga samo-falaha ah ee Cabdimaalik Muuse Coldoon ayaa sheegay in uu ka baxay Magaalada Burco ee Gobolka Togdheer oo uu ka soo jeedo.
Saxafigan ayaa sababta ku sheegay in uu helay xogo sheegaya in Xukuumadda Somaliland xarig u qorshaynaysay.
"Xalay ayaan guure kaga baxay magaaladaydii Burco ka dib markii aan ogaaday in la go’aamiyey in lay xidho” ayuu yiri Coldoon.
Waxa kale oo uu intaa ku daray in uu joogo meel aammin ah. Coldoon waxa sida wararku sheegayaan lagu haystaa hadal uu Baraha Bulshada ku qorey oo uu ku weerarey maamulka Somaliland kaas oo uu ku sheegay in ay tahay xukuumada caloosheed u shaqaysato ah.
Marar badan ayaa sidan oo kale uu Coldoon xarig uga baxsadey xilligii Muuse Biixi markaas oo uu tagey deegaanka Soomaalida ee Itoobiya gumeysato. Marar kale oo badanna waxa uu xarig ku mutaystay aragtidiisa shaqsiga ah, gaar ahaan xilliyadii Siilaanyo iyo Korneyl Biixi.
Si aad u hesho wararka degdegga ah kusoo biir Channel-kayagana cusub: https://t.me/+fgpQcPdzzy4wZDQ0
