Wasiirka wasaaradda arrimaha dibadda ee xukuumadda saliibiyadda Ingiriiska ninka lagu magacaabo David Lammy ayaa shalay baarlamaanka dalkiisa ka hor-sheegay in ay si weyn uga walaacsan yihiin awoodda sii bulaalaysa ee dagaalyahannada Al-Shabaab.
David Lammy ayaa xusay in werwerkan isa soo taraya ee laga qabo Xarakada Al-Shabaab sidoo kale lagu soo hadal-qaaday shirar ay wada yeesheen dalalka la isku yiraa G7 ee Maraykanka, Ingiriiska, Faransiiska, Jarmalka, Talyaaniga, Kanada iyo dalka Japan.
Gavin Williamson oo horey u soo noqday Xoghayaha Gaashaan-dhigga Ingiriiska, haatanna ah Xildhibaan ka tirsan baarlamaanka dalkaasi, ayaa xoghayaha arrimaha dibadda weydiiyey qorshahooda la xiriira taageerada maamulka Somaliland, maadaama ayuu yiri iyaga iyo Ingiriiskuba ay wajahayaan halisaha Jihaadiyiinta Al-Shabaab.
Wasiirka arrimaha dibedda ayaa ku raacay soo-jeedinta Xildhibaan Williamsom waxaanu caddeeyey in marnaba aan la dafiri karin walaaca ay ka qabaan awoodda sii xoogaysanaysa ee Xarakada Al-Shabaab.
David Lammy, waxa kale oo uu shaaciyey in ka xukuumad ahaan ay taageeri doonaan aragtida uu Xildhibaanku soo jeediyey isla markaana ay la shaqeeyaan shaqayn doonaan saaxiibadooda Somaliland.
Walaacan kasoo yeeray xukuumadda Ingiriiska ayaa kusoo aadaya xilli Jihaadiyiinta Al-Shabaab ay ka taqadumayaan deegaanno ku dhow magaalada caasimadda ah ee Muqdisho iyagoo shalay halis geliyay Xasan Gurguurte kadib markii ay weerar kula beegsadeen afaafka hore ee madaxtooyada Villa Somaliya.
