Asiyaas Afawarki oo ah madaxweynaha xukuumadda Ereteriya ayaa wareysi dhinacyo badan taabanaya oo uu bixiyay wuxuu si faah faahsan uga hadlay taxaalufaadka siyaasadeed ee kasoo kordhay geeska qaaradda isagoo dhaleecayn culus u jeediyay hab-dhismeedka dowladda xabashida Itoobiya.

Ugu horrayn Afawarki ayaa sheegay in isbahaysigii sedax-geesoodka ahaa ee u dhaxeeyay Masar, Ereteriya iyo kooxda Villa Soomaaliya uusan halis ku aheyn dowladda xabashida Itoobiya balse uu yahay isbahaysi xoojinaya deganaanshiyaha geeska afrika sida uu hadalka u dhigay.

Mar wax laga weydiiyay sida ay Ereteriya u aragto dagaalka sokeeye ee ka holcaya geeska afrika ayuu beeniyay in dowladdiisu ay ku lug leedahay colaadda Itoobiya ka jirta ama ay doonayso in ay burburto xukuumadda Addis Ababa.

"Ereteriya maslaxad uguma jirto Itoobiya oo khalalaasa hor leh sii dhax muquurata ama burburta, waa been aan sal laheyn waxa uu iclaamku faafinayo ee aan qeyb ka nahay duminta Itoobiya" ayuu yiri kaligii taliyaha maamulka Ereteriya.

Inkastoo uu Afawarki dafiray ku lug lahaanshiyaha ciidamadiisa ee colaadda Itoobiya hadane wuxuu qiray sida uu u diidanyahay hab dhismeedka dowladda Xabashida oo uu ku sifeeyay mid ceebaysan oo dhan walba ka arradan.

Afawarki wuxuu wax xun ku tilmaamay Dastuurka Itoobiya ee la qoray sanaddii 1994-tii wuxuuna ku sifeeyay mid kaalin weyn ku leh deganaanshiyo la'aanta geeska afrika iyo Itoobiya qudheeda.

Falanqeeyaasha ayaa aaminsan in Itoobiya iyo Ereteriya aysan huri doonin dagaal lagu hoobto oo mar kale dhex-maraya marka la eego damaca waalidda bad-raadiska ah ee Abiy Axmed iyo Afawarki oo aan diyaar u aheyn in uu ciidamadiisa kala baxo degmooyin ka tirsan gobolka Tigray ee waqooyiga Itoobiya.