Shirkadaha duullimaadyada ee Turkish Airlines iyo Qatar Airlines ayaa shalay hakiyey duullimaadyadii ay ku iman jireen magaallo-madaxda Soomaaliya ee Muqdisho.
Duullimaadyadan ayaa u baaqday sabab amni darteed, sida warbaahinta maxalligu ay tibaaxayso, waxaanay kusoo aadaysaa xilli Mareykanka uu digniin amni u diray muwaadiniintiisa Amerikaanka ah ee ku sugan dalka Soomaaliya.
Inkastoo uusan jirin war rasmi ah oo laga soo saaray sababta loo joojiyey duullimaadyadan, haddana wakaalladaha socdaalka ee jara tikidhada Turkish Airline ayaa loo sheegay inay shirkaddu hakisay duullimaadyadii ay ku iman jirtay garoonka diyaaradaha ee Aadan Cadde.
Wararka ayaa intaas ku daraya in duullimaadyadaas la hakiyey muddo lix cisho ah oo ka bilaabmaysa 6-da Maarso ilaa 12 Maarso, waxaana dadkii shalay ku qornaa diyaaradda Turkish Airlines lala wadaagay fariin ku saabsan in uu baaqday duullimaadkii diyaaraddu.
Sidoo kale ilo ka mid ah howl-wadeennada gegida diyaaradaha ee Aadan Cade ayaa idaacad laga leeyahay Maraykanka u sheegay inaysan jirin maanta oo khamiis ah wax duullimaad ah oo ay diyaaradda Qatar Airline ay ku iman doonto magaallada Muqdisho.
Tallaabada ay sharikadahani ku hakiyeen duullimaadyadooda ayaa timid saacado uun kadib markii Safaarada Mareykanka ee Muqdisho ay shaacisay in la helay xog sheegaysa weerarro ka dhan ah muwaadiniinteeda ku sugan Soomaaliya, kuwaas oo lagu bartilmaameedsan karo ayay tiri meelo ay ka mid yihiin garoonka diyaaradaha ee Aadan Cadde.
Digniinta Maraykanka ayaa kusoo aadaysa xilli hawl-gallada Al-Shabaab ay ku socdaan dar-dar xooggan, gaar ahaan Shabeellaha dhexe oo usbuucyadan u dambeeyey ay ka socdaan gulufyo saf ballaaran ah oo afka ciidda loogu daray maleeshiyaadka murtazaqada ah ee kooxda Villa Soomaaliya.
Si aad u hesho warar daray ah ku xirnow Telegram-ka Somalimemo: https://t.me/+fbGFEJ91CX02ODU0
