Dagaal culus oo la isku adeegsanayo hubka noocyadiisa kala duwan ayaa Waa-berigii saaka dib uga qarxay deggaan dhaca galbeedka gobolka Mudug ee dalka Soomaaliya.
Maleeshiyo-beeleed kala taabacsan maamullada daba-dhilifyada ah ee Galmudug iyo Puntland ayaa ku dagaallamaya deggaannada Jiicboor iyo Saax Qurun.
Ilo dadka deggaanka ah oo warbaahinta la hadlay ayaa sheegay in dagaalku uu ahaa mid aad u xooggan isla markaana uu ku fiday deggaanno hor leh.
Wararka ayaa intaas ku daraya in khasaare isugu jira dhimasho iyo dhaawac oo labada dhinac ah uu ka dhashay iska hor imaadkaasi. Inkastoo tiro sugan aan laga helin.
Xaaladda deggaannadaasi ayaa weli ku jira hubanti la’aan amni, waxaana dhaq-dhaqaaqyo iska soo horjeedo laga dareemayaa deggaannadaasi, gaar ahaan aagagga lagu dagaallamay.
Xiisaddan ayaa kusoo aadaysa xilli maalmihii lasoo dhaafay ay gobolkaasi ka dhacayeen dagaal-beeleedyo la isku fara saaray oo si weyn u saameeyey dadka deggaanka.
Dagaalladan beelaysan ee kusoo laab laabtay gobollada Galgaduud iyo Mudug, ayaa la rumaysan yahay inay hurinayaan maamullada shisheeye-kalkaalka ah ee Puntland iyo Galmudug.
