Wargeyska The Hill oo xaruntiisu tahay Washington ayaa daabacay warbixin dheer oo uu kaga warramayo xaaladda amni ee Soomaaliya iyo sida Ururka Alshabaab ula wareegi karaan dhammaan dalka.
Wargeysku wuxu sheegay in ururkan Selefiyiinta ah ee AS ay la wareegeen goobo muhiim ah oo ku yaalla Shabeellada Dhexe iyo Shabeellada Hoose. Sidoo kale waxa uu tibaaxay in ay goobo muhiim ah oo ku yaalla afaafka hore ee Muqdisho ay soo gaareen.
Labadii caqdi/tobnaad ee ugu dambeeyay Mareykanka iyo Midowga Africa ayaa taageerayey Dowladda Federaalka si meesha looga saaro AS laakiin taasi suurogal uma muuqato ayuu raaciyey.
Wargeyskan ayaa sida oo kale waxa uu qaadaa dhigey sida dadka caasimadda Muqdisho ku nooli cabsi uga qabaan awood la’aanta Xukuumadda fadhigeedu yahay Muqdisho.
Bishii ina dhaaftey ee March 18-keedii waxa uu Xasan Sheekh ka badbaadey qarax lagula beegsadey agagaarka Madaxtooyada Soomaaliya taas oo caddaynaysa tabaryarida Dowladda Federaalka ee shisheeyuhu taageero.
The Hill wuxu ka digey in Dowlad Sunni ahi meesha ka saarto Dowladdii ay taageerayeen Mareykanka iyo Saliibiyiintu.
Qabsashada AS ee Soomaaliya ayuu wargeysku ku tilmaamey in ay tahay bilowga meel AS ka geli karto Geeska Afrika taas oo uu ula jeedo in Islaamku ku fidi karo mandaqadda taasina ay ahayd waxa ay horjoogeen sannado badan.
Waxa kale oo qoraalka lagu xusay in dadka Mareykanka ahi keliya ay dalkan ka yaqaannaan intii ay ku arkeen filimadii Black Hawk Down iyo Captain Phillips ee ka kala hadlayey dagaalkii Mareykanka iyo Soomaalida ee 1993 iyo "Burcad-Badeeddii” 2009 ka dillaacdey Soomaaliya.
Wargeysku wuxu ugu dambayn ka hadley haddii Dowladda Federaalku dunto in ay halis galayaan ganacsiyadii iyo shixnadihii millateri ee Reergalbeedka u mari jiray Gacanka Cadmeed iyo Badweynta Hindiya.
Warbixinaha noocan oo kale ah ayaa soo baxaya xilli Ciidanka Xasan Sheekh goobo badan ku jabeen isla markaana uu Madaxweynaha Federaalku ku sugan yahay Jabbuuti.
