Faahfaahin dheeraad ah ayaa kasoo baxaysa weerarkii dhabbo-galka ahaa ee saaka xoogagga Al-Shabaab u dhigeen kolonyada maleeshiyaadka dawladda ee ku socdaalayay duleedka degmada Afgooye ee gobolka Shabeellaha hoose.
Sidii aanu horeyba idiinku soo gudbinay kolonyadan la weeraray oo hadafkoodu ahaa inay soo gelbiyaan kolonyo kale oo Sahay u wadday saldhigga Balli-doogle ayaa ku dhacay kamiin culus, waxaana gaadhay khasaare culus oo dhimasho iyo dhaawacba leh.
Ilo-wareedyo aanu goor dhawayd helnay ayaa sheegaya in dagaalkaasi ugu yaraan lagu dilay 6 askari oo ka tirsan maleeshiyaadkii la weeraray, isla markaana laga dhaawacay 9 kale, halka baabuur Cabdi Bile ah gacanta lagu dhigay, mid kalena waxyeello xooggan la gaadhsiiyey.
Weerarkan ayaa ahaa mid ay dhabar-jab xooggan kala kulmeen maleeshiyaadka dawladdu, isla markaana ku khasbay kolonyadii sahayda wadday inay raadkoodii dib u qaadaan oo ay ku laabtaan halkii ay kasoo dhaqaaqeen ee magaallada Muqdisho.
