Musharraxa Madaxweyne ee Xisbiga Waddani ee maamulka Somalilad ka tartama ayaa sheegay in 7-da sano ee Muuse Biixi uu madaxweynaha ahaa in ay Somaliland ku jirtey xaalad hanjabaad iyo xarig ah.
Cabdiraxmaan-Cirro oo ka hadlayey isu soo baxa ololaha ayaa sidoo kale Muuse Biixi ku eedeeyay in uu isku day dil u geystay madaxweynihii hore ee Somaliland Siilaanyo.
"Muuse halganka wuxu ku leeyahay boog madow, wuxu isku dayey in uu jidgooyo u galo Axmed Siilaanyo oo uu dilo” ayuu yiri Cirro.
Dhanka kale waxa uu ka hadlay maxaabiista Somaliland lagaga qabsadey Goojacadde bishii Ogoosto ee sannadkii ina dhaafey taas oo uu mas’uuliyaddeeda dhakada u saarey Muuse Biixi.
"Madaxweynuhu in uu dabbaaldego ma ahayn maanta, 300 oo sarkaal ayaa jeel ku jira maalinna kamuu hadal” ayuu yiri Cirro.
Xilliyada ololaha ee maamulka Somaliland waxa bata eedaymaha ay isu jeedinayaan dhinacyada ku tartamaya jagada ugu sarreysa ee maamulkaas.
Muuse Biixi ayaa dhankiisa mucaaridka SL ku eedeeya in ay xiriir la leeyihiin Soomaaliya.
