Taliye sare oo ka tirsanaa ciidanka Xabashida Itoobiyo iyo lix ka mid ah ilaaladiisa ayaa isniintii lasoo dhaafay lagu dilay weerar dhabbo-gal ah oo ka dhacay inta u dhaxaysa Dangilla iyo Addis Kidam oo ka tirsan gobolka Gojjam ee dalka Itoobiya.
Sarkaalkan iyo askartiisa oo faahfaahin dheeriya aan laga bixin ayaa dhintay kadib markii ay Miino la kacday gaari ay la socdeen, isla markaana gaarigii iyo qori dhashiike ah oo saarnaa ay gabi ahaanba burbureen, sida uu sheegay Marshet Tsehayu oo ah Wakiilka Xidhiidhka Dadweynaha ee gobolka Gojjam u qaabilsan Jabhadda Fano.
Marshet ayaa u sheegay Warbaahinta Itoobiya (EMS) in dagaalka u dhaxeeya Fano iyo ciidanka Xabashida Itoobiya uu weli ka socdo deggaano badan oo ka tirsan Gojjam, oo ka mida deggaannada Axmaarada isla markaana ay sii wadayaan dagaallada gaadmada ah, jabhaddaynta iyo xeeladaha weerarrada degdega ah.
Geesta kale Fentaw Kebede, oo ahaa maamulaha degmada Werebabo ee Koonfurta Wollo, ee Gobolka Axmaarada, ayaa isaga iyo laba xubnood oo kale lagu dilay weerar ay kooxo hubaysani ku qaadeen Talaadadii shalay, sida uu ku dhawaaqay maamulka degmada.
Sidoo kale iska hor-imaadyo u dhaxeeyay ciidamada Xabashida Itoobiya iyo Maleeshiyaadka Fano ayaa ka dhacay deggaan lagu magacaabo Shoo, halkaas oo sida la sheegay ciidamada dowladdu ay isku dayeen dhaqdhaqaaqyo ay doonayeen inay ku wiiqaan awoodda Fano ee deegaankaasi.
In ka badan 80% dhulka Amxaarada in weli ay gacanta ku hayaan maleeshiyaadka Fano. Abebe Fantaw oo ka mid ah hogaamiyayaasha Fano ee Wollo (Bete Amhara) ayaa dhawaan shaaciyey in ay jiraan magaallooyin ay go’doomiyeen.
