Madaxweynaha Mareykanka Donald Trump iyo ku xigeenkiisa ayaa kulan kula yeeshay guriga looga taliyo Mareykanka madaxweynaha Ukraine Zelenisky.
Kulankan ayaa lagaga wada hadlayey sidii loo soo afjari lahaa dagaalka saddex sano jirsadey ee Ukraine iyo Ruushka.
Donald Trump ayaa bilowgiiba u sheegay Zelenisky in uu yahay qof bilaa ixtiraam ah oo aan garanayn waxa uu ku kacayo.
"Waxaad tahay bilaa ixtiraam...waxaad hurinaysaa in dunida uu ka qarxo dagaalkii saddexaad” ayuu yiri Trump.
Zelenisky ayaa hadallo darandoorri ah kala kulmayey Trump iyo ku xigeenkiisa xilli uu isku dayayey in uu isdifaaco.
Madaxweynaha Ukraine waxa lagu qasbayey in uu nabad qaato oo wadahadal la galo Ruushka halka uu taas diiday.
"Putin waa argagixiye, wadahadallo hore oo socday ayuu nooga baxay” ayuu yiri Zelenisky.
Dhanka kale Trump ayaa xusay in haddii aanay jirin taageerada hubka iyo lacagta ah ee Mareykanku siinayey Ukraine aanay suurtogal ahaateen in uu madaxweyne sii ahaadaa oo lagu jabin lahaa laba toddobaad gudahood.
Si kastaba ha ahaatee Zelenisky waxa laga cayriyey Aqalka Cad xilli uu rabey in uu sii joogo sida saxaafadda dunidu ku warrantay.
Kulankan ayaa ahaa midkii ugu liitey abid ee Mareykanka iyo Dowlad kale dhex mara, kulanka gadaashiis lama qaban wax shir jaraa’id ah sidii hore u dhici jirtay.
Hoggaamiyeyaasha dalalka reer Yurub badankood ayaa aad uga xumaadey wax ku dhacey Zelenisky isla markaana waxa ay sheegeen in ay garab taagan yihiin, halka Ruushku uu soo dhaweeyay.
Shirka ka dib Trump waxa uu isugu yeedhay la taliyeyaashiisa halkaas oo ay shir dambe ku wada galeen.
Geesta kale Hogaamiyayaasha dalalka Yurub ayaa shaaciyey inay si weyn u garab taagan yihiin madaxwaynaha Ukraine iyo dalkiisa, kadib kadib bahdilkii uu kala kulmay Trump.
Hogaamiyeyaasha Yurub ayaa sidoo kale sheegay inay Ukraine si buuxda ugu garab siinayaan dagaalka ay kula jirto Ruushka, arrintan oo dood weyn abuurtay.
