Xasan Sheekh Maxamuud oo ah madaxweynaha dowladda Federaalka Soomaaliya ayaa wajahaya cadaadisyo siyaasadeed oo gudaha iyo dibadda ah arrinkaas oo saameyntiisa laga dareemay dhanka Villa Somaliya.
Waxa loogu yeero beesha caalamka ayaa digniin culus u dirtay Xasan Gurguurte iyagoona waqti u qabtay si uu isbedel siyaasadeed u sameeyo, ilo-wareedyo ayaa sheegaya in dowladaha loogu yeero C6+ ay madaxweynaha DF-ka ku amreen in uu sedax arrimood ku hirgeliyo muddo Afar bilood gudahood ah.
Ilo-wareedyada ayaa tibaaxaya in waxa loogu yeero beesha caalamka ee Xalane deggan ay Xasan Sheekh u sheegeen in uu qabto shir siyaasadeed uuna madasha siyaasadda dib ugu soo celiyo maamullada Jubbaland iyo Puntland.
Sidoo kale waxay ku amreen in uu qabto shir ay u dhan yihiin waxa loogu yeero saamileyda siyaasadda oo ay ku jiraan madaxdii hore ee DF-ka iyo siyaasiyiinta mucaaradka ah isla markaana la jaan-gooyo qaabka ay u dhacayso doorashada madaxtinimada iyo midda baarlamaanka marka la gaaro sanadda 2026.
Waxa loogu yeero C6+ oo ah dowladaha sida dhabta ah u maamula Soomaaliya ayaa Xasan Gurguurte si cad ugu sheegay in aysan bixin doonin qarashka ku baxaya ciidamada shisheeyaha AUSSOM inta uu ka fulinayo amarkan cusub isla markaana ay fursad siinayaan illaa bisha May ee soo socota.
Wararka ayaa intaas ku daraya in 'Beesha caalamka' ay hoggaanka DF-ka ku wargelisay in ay bixinayaan oo kaliya 51% qarashka loo qoondeeyay ciidamada Afrikaanta sidaas daraadeed dowladaha midowga Afrika laga doonayo in ay qarashka kale dusha u ritaan.
Digniintan loo diray Xasan Gurguurte ayaa imaanaysa xilli ay DF-ka dhaxdeeda ay wajahayso khilaafaadyo siyaasadeed islamarkaana weli aan heshiis laga gaarin dowladaha ay ka imaanayaan ciidamada isbahaysiga AUSSOM.
