Iyadoo diyaar-garowga dagaal ee Itoobiya iyo Eretriya uu maraayo marxaladihii u dambeeyey ayaa Gen. Tsadkan Gebretensae oo ah Madaxweyne ku-xigeenka maamulka ku-meel-gaarka ah ee Tigray ayaa sheegay in dagaal ka dhex qarxa labadaasi dal uu u muuqdo mid lama huraan ah.
Gobolka Tigrey oo sida la saadaalinayo halis ugu jiro inuu noqdo masraxa ugu weyn ee dagaalka, ayuu Gen Tsadkan ka dhawaajiyey in ka gobol ahaan ay door bidayaan inay ka fogaadaan colaadda noocaas ah ee laga yaabo inay isu bedesho gacan-ka-hadal.
"Xilli kasta, dagaal u dhexeeya Itoobiya iyo Ereteriya wuu qarxi karaa,” ayuu yiri Tsadkan, oo hore u ahaan jiray Taliyaha Guud ee Ciidamada Difaaca Itoobiya, kaas oo arrimahan kaga hadlay faallo uu ku qoray Wargeyska The African Report, isagoo ka digay in colaaddu ay ku fiddo meelo ka baxsan labadaasi dal.
Waxa uu ku dooday in xiisadda Addis Ababa iyo Asmara ay si tartiib tartiib ah usii xumaanaysay tan iyo wixii ka dambeeyey heshiiskii Pretoriya ee dawladda dhexe iyo Tigrey. Isagoo xusay in colaaddu ay haatan marayso heerkii ugu dambeeyey.
Waxa uu ku eedeeyay Eritriya in ay doonayso inay "ka faa'iidaysato dalalka ku xeeran, gaar ahaan Itoobiya iyo Suudaan. Isagoo ku andacooday in Eritriya ay Tigray-ga u aragto caqabadda ugu weyn ee hamigeeda ku hor-gudban.
Tsadkan ayaa sidoo kale ka digay in kala qaybsanaanta ka dhex jirta Tigrayga ay xaaladda sii murgin karto. Isla markaana garab ka mida Tigrey-gu ay ku biirayaan isbahaysiga Isaias Afawerki, iyagoo Eretriya u arka ayuu yiri awood meesha looga saari karo Abiy Axmed. Waxaanu ku tilmaamay kuwo aan dan ka lahayn masiirka Tigrey-ga.
Madaxweynihii hore ee Itoobiya Mulatu Teshome ayaa isna ka digay ficillada madaxweynaha Eritrea Isaias Afwerki oo uu ku eedeeyay in uu isku dayay inuu ka faa’iidaysto kala qaybsanaanta kooxda TPLF si uu u wiiqo heshiiskii nabada ee Pretoria.
Eretriya waa ay diidday eedeymahaas, iyadoo wasiirkeeda warfaafinta Yemane G. Meskel uu ku tilmaamay dacwad xamaasad leh oo loola jeedo in lagu abuuro ajande dagaal. Eretriya waxay ku doodday in xasaradaha gudaha ee Itoobiya aan laga dhigin kuwo dibadeed.
Tsadkan wuxuu sheegay in cawaaqib xun uu ka dhalan doono dagaal dib uga soo cusboonaada mandiqadda, kaas oo is bedel ku keeni kara ayuu yiri juqraafiga dawladaha Geeska Afrika iyo saaxadda Badda Cas, si ka duwan sida ay hadda yihiin.
