Wax yar kabacdi markii uu qaraxu ka dhacay goobta xasaasiga ah ee iridda madaxtooyada, ayaa kooxda Gurguurte waxay qaadeen ol’ole ballaaran oo ay kusoo qab-qabanayaan suxufiyiintii aaggaasi ka dhawayd ee waxuun Kaamiradoodu ay ka haleeshay mashaqada meesha ka dhacday.

Ugu yaraan 17 wariye oo isugu jira suxufiyiinta maxalliga ah ee ka hawl-gala idaacadaha gudaha iyo kuwa caalamiga ah ayaa shalay xabsiyada laga buuxiyey, gaar ahaan saldhigga Xamar Jajab ee magaallada Muqdidsho, sida uu xaqiijiyey ururka suxufiyiinta ee magacooda loosoo gaabiyo SJS.

Ururkan ayaa sheegay in la xir-xiray wariyeyaashan, kadib markii ay wax ka tebiyeen goobta uu qaraxu ka dhacay ee afaafka hore ee madaxtooyada Villa Somaliya. Isla markaana xoog looga qaatay Kaamirooyinkii iyo qalabkii ay wax ku duubeen, lagana tirtiray dhammaan sawirradii iyo muuqaalladii ay ka duubeen goobta qaraxa.

Sidoo kale Ururrada suxufiyiinta SJS iyo SOMA, ayaa shaaca ka qaaday in isla shalay duhurkii xabsiga lagu guray 5 suxufi oo ka hawl-gala mid ka mida idaacadaha maxalliga ah isla markaana albaabada la isugu dhuftay xaruntoodii magaallada Muqdisho.

"Ciidamo hubeysan ayaa duhurnimadii shalay xoog ku galay xarunta Idaacadda ee degmada Xamar Jajab ee magaalada Muqdisho. Waxay amar ku bixiyeen in hawada laga saaro idaacadda ka hor inta aysan xirin dhammaan shanta wariye ee goobta ku sugnaa.” Ayuu lagu yiri bayaan ay wada-jir u soo saareen Ururradaasi.

War-murtiyeedka ayaa sidoo kale lagu sheegay in idaacaddani ay ahayd tii ugu horreysay ee baahisay warka ku saabsan qaraxii shalay ka dhacay afaafka madaxtooyada ee lagu weeraray kolonyadii uu la socday Xasan Gurguurte, oo uu ka dhashay khasaare isugu jira dhimasho iyo dhaawac.

Si kastaba ha ahaatee kooxda Villa Somaliya inay daad-gureeyaan dhimashadii iyo dhaawacyadii is-barkanaa, waxay ka door-bideen inay baacsadaan wariyeyaashii ay ku adeegan jireen ee isla iyaga u ahaa caroogga ay dhex-marsadaan farriimaha liita.