Wararka ka imanaya koonfurta dalka Soomaaliya ayaa sheegaya duqayn diyaaradeed oo xalay lagu beegsaday dad shacab ah oo ku noolaa deggaano kala duwan.
Sida aanu xogta ku helnay ugu yaraan 3 qof oo dumar ah ayaa ku dhintay duqayn diyaaradeed oo xalay fiidkii ka dhacday deggaanka Ceel-bacad ee gobolka Shabeellaha dhexe.
Goob-joogayaal ayaa warbaahinta u sheegay in diyaaradaha dagaalka ee Xabashida Itoobiya ay ilaa 7 Foosto oo shidaal ka buuxo ku dhufteen guryo ay deggenaayeen dad shacab ah.
Guryaha ay diyaaraduhu beegsadeen ayaa lagu soo warramayaa in ay gubteen, waxaana mid ka mida guryahaasi ku dhintay dadkii deggenaa.
Nabaddoon Macallin Muxumed ayaa sheegay in dadka dhintay ay ahaayeen hooyo iyo labo caruur ah oo ay dhashay.
Sidoo kale isla habeennimadii xalay diyaaradaha dagaalka ee Itoobiya ayaa duqeymo ka geystay magaallada Jilib ee gobolka Jubbada dhexe.
Ilo-wareedyo ayaa sheegaya in foostooyin shidaal ka buuxo ay ku tuureen gudaha degmada, waxayna si gaar ah u beegsadeen suuqa Jilib iyo Jaamacadda Al-Qimmah.
Xogta ayaa intaas ku daraysa in halkaasi Hanti badan ay ku basbeeshay, walow dabka lagu guulaystay in xilli dambe oo xalay ah la damiyo.
Sida aanu xogo hoose oo nasoo gaaray ku helnay duqaymaha noocan ah oo ku cusub Soomaaliya ayaa ah mashruuc ay wada-jir iskula qaateen Xasan Gurguurte iyo Abiy Axmed.
Waxaanay xogtu tibaaxaysaa in duqaymaha noocan ah loogu talo-galay in lagu baabi'iyo magaallooyinka dalka laguna gubo dhulka dhirta leh ee ay xooluhu daaqaan.
Maalmo ka hor ayay ahayd markii dhul badan oo Shabeellaha dhexe iyo weliba Hiiraan ah ay sidan oo kale ay diyaaradaha Itoobiya ugu tuureen foostooyin shidaal ah.
