Wararka ka soo baxaya ururka loogu yeero Midowga Afrika ayaa sheegaya in la soo saarey dalalka sida rasmiga ah uga qayb qaadanaya Hawlgalka AUSSOM ee lagula dagaallamayo Islaamiyiinta Soomaaliya.
Ka dib khilaaf dublomaasiyadeed oo u dhexeeyay Itoobiya, Soomaaliya iyo Burundi ayaa la soo afjarey sida uu sarkaal ka tirsan AU u sheegay Idaacad laga leeyahay Maraykanka.
Ciidamada Burundi oo tan 2007 ku sugnaa Soomaaliya ayaa gebi ahaanba laga saarey hawlgalka ka dib khilaaf ka yimi dhanka tirada ciidanka ee ka imanaysa Burundi.
Midowga Afrika waxa ay tibaaxeen in hawlgalkooda ka dhanka ah gobonnimada Soomaaliya uu ka koobnaan doono 11,900 oo isugu jira askar, boolis iyo hawlwadeenno dharcad ah.
Dalalka ka qayb qaadanaya ayaa kala ah Yugaandha oo qaadatey ciidanka ugu badan 4,500 oo askari. Itoobiya oo loo qorsheeyay 2,500 oo askari, Jabbuuti oo qaadanaysa 1,520 askari, Kenya oo la siiyey 1,410 iyo ugu dambayn Masar oo ku cusub hawlgalkan uguna ciidan yar oo qaadatey 1,091 askari.
Waxa intaa lagu darey in tirooyin boolis ah oo ka soo jeeda Nayjeeriya, Siiraliyoon iyo Masar ay heegan ku ahaan doonaan Muqdisho, Jawhar iyo Baydhabo.
Hawlgalkii kan ka horreeyay oo muddadiisu labo sano ahayd laguna magacaabi jirey ATMIS ayaa la qorshaynayey in uu noqdo midka ugu dambeeya ee Ciidamada Shisheeye kaga hawgali doonaan Soomaaliya laakiin markale Xukuumadda Xasan Sheekh ayaa codsatey in la taageero Nidaamka Federaalka ah ee shisheeyuhu sameeyay.
