Wararka ka imanaya dalka Itoobiya ayaa sheegaya dagaallo culus oo maalmihii u dambeeyey ciidanka dawladda Xabashida Itoobiyoa iyo Jabhadda Fano ku dhex-maraayay afarta goobood ee ugu waaweyn gobolka Amxaarada.
Sida ay tebinayso qaybo ka mida warbaahinta maxalliga ah ee Itoobiya, labo aag oo ka tirsan gobolka Goojam waxaa ka dhacay dagaallo xooggan, kadib markii ciidamada dawladdu ay damceen in labo jiho ay ka galaan magaallada Quarit.
Jabhadda Fano ayaa lagu soo warramayaa inay si adag isaga difaacday weerarkaasi, isla markaana uu jiro khasaare aan la cayimin oo kala gaaray labada dhinac. Sidoo kale deggaannada Debrework iyo Gendewoin ee dhaca Bariga Gojjam, waxaa ka dhacay weerarro ba’an oo geystay dhimashada askar iyo saraakiil ka tirsan ciidanka dawladda, sida ay sheegatay jabhadda Fano.
Gonder, waxaa laga soo sheegayaa weerarro saf ballaaran ah oo maleeshiyaadka Fano ay ku qaadeen fariisinno ay ciidanka dawladdu ku lahaayeen deggaanno ay ka mid yihiin Debmia, Robit, iyo Chuahit. Waxaana jira khasaare labada dhinac ah oo aan la faahfaahin.
Sidoo kale dagaal culus ayaa labadan dhinac ku dhex-maray magaallada Shoa, gaar ahaan deggaanka Jiru oo 100 KM u jira caasimadda Itoobiya ee Addis Ababa. Waxaana jira hub culus oo ku gubtay goobihii lagu dagaallamay, sida laga soo xigtay ilo deggaanka ah.
Dhinaca kale ciidanka difaaca Itoobiya ayaa lagu soo warramayaa inay guullo ka sheegteen dagaalkaasi. Waxaana General Assefa Chekol, oo ah taliyaha taliska waqooyi bari, uu sheegay inay aaggaasi ka sifeeyeen xag-jiriinta oo uu ula jeedo Jabhadda Fano.
