Dhul-gariir cabirkiisa lagu sheegay 5.5 ayaa Axaddii lasoo dhaafay ku dhuftay gobolka Canfarta ee dalka Itoobiya, sida ay sheegtay waxa loogu yeero hey'adda sahaminta dhulka ee Maraykanka (USGS).
Goobta uu dhul-gariirku ka bilawday ayaa ku taalla meel qiyaastii 45 KM waqooyi ka xigta magaallada Hawash, oo ah gobolka caan ku ah dhaqdhaqaaqa juquraafiyadeed.
Dhul-gariirkan oo ka dhacay masaafo dhan 10 KM ayaa lagu soo warramayaa inuu ahaa mid xooggan oo laga dareemay meelo badan oo ay ku jirto xarunta Itoobiya ee Addis Ababa.
Dhul-gariirkan ayaa la sheegayaa in sidoo kale laga dareemay magaallooyin dhowr ah, oo ay ku jiraan Metahara, Mieso, Abomsa, iyo Gelemso, Kobo,Robit iyo Debre Sina.
Dadka ku dhaqan deegaannadaasi ayaa sheegay in ay la kulmeen gariir balse ilaa hadda lama hayo tirakoob sugan oo xaqiijin kara khasaaraha ka dhashay dhul-gariirkaasi.
Waa dhul-gariirkii u dambeeyey oo ku biiraya dhul-gariirro usbuucyadii lasoo dhaafay tiraba dhowr jeer oo xiriir ah saameeyey dalka Itoobiya.
Dhacdadii tan ka horeysay ayaa ahayd dhul-gariir cabbirkiisu ahaa 5.2 oo ku dhuftay meel 46 KM geesta bari kaga beegan magaalada Adigrat ee gobolka Tigrey.
Sidoo kale, horraantii bishan, dhul-gariir cabbirkiisu dhan yahay 6.0 ayaa ka dhacay meel 6 KM oo keliya u jirta magaallada Metahara oo ka tirsan gobolka Oromada.
Xeel-dheerayaasha cilmiga dhulka ayaa sheegay in dhul-gariirrada lagu qiyaaso inta u dhaxaysa 5.5 iyo 6.0 ee cabirka Richter ay waxyeellayn karaan dhismayaasha iyo kaabayaasha dhaqaallaha.
Gobolka Canfarta ayaa sidiisaba ku fadhiya gudaha Rift Valley, oo ah dillaac weyn oo ka dhacay oogada dhulka, ahna xuduud-dhaqdhaqaaqeed dhulka hoostiisa ah, halkaas oo sida la sheego kala qaybisa qaaradda Afrika.
Goobtan juqraafiyeed ee dhul-gariirku ku badan yahay waxay gobolka ka dhigtay mid u nugul dhaqdhaqaaqyada dhulka, inkasta oo dhul-gariirrada waaweyn ee wax burburiyaa ay yihiin kuwo naadir ah.
