Wakaaladda Wararka ee AP ayaa shaley baahisay warbixin ay ku xustay in saraakiil Mareykan ahi la xiriireen Suudaan, Soomaaliya iyo Somaliland kuwaas oo ay u soo jeediyeen haddii ay aqbalayaan in shacabka reer Falastiin loo raro dhulkooda taas oo ay ka socdeen ballanqaadyo.
Ballanqaadyada waxa ka mid ahaa haddii Somaliland aqbasho in ay dhul siiso dadka la soo barakicinayo in la aqoonsanayo, Suudaanna in laga kaabayo dhanka dhaqaalaha iyo millateriga. Suudaan ayaa iyadu ku gacan saydhay soo jeedinta xubnaha Mareykanka ah.
Geesta kale Wasiirka Arrimaha Dibedda DF Soomaaliya ayaa diidey qorshaha Mareykanka ee lagu barokicinayo dadka shacabka ah ee Falastiin.
Dhanka kale Wasiirka Arrimaha Dibedda Somaliland ayaa isna dhankiisa Wakaaladda Wararka Rueters u sheegay in aanay jirin wax wada-hadal ah oo ku saabsan baracinta shacabka Falastiin oo ay cid la yeesheen.
"Ma jirto soo jeedin la xidhiidha arrinkaas, mana jiro wadahadallo aan cid la yeelannay oo ku saabsan arrimaha Fakastiiniyiinta” ayuu yiri Cabdiraxmaan Daahir.
Sidoo kale waxa soo baxay warbixin ay qortey Majalladda Financial Times taas oo lagu xusay in Mareykanku doonayo in uu dekedda Berbera ka samaysto saldhig millateri taa beddelkeedana uu Somaliland u aqoonsado dal madax bannaan.
Wargeyska oo xiganaya sarkaal Mareykan ah ayaa sheegay in markii ugu horreysay Mareykanku wadahadal kala yeeshay Somaliland arrinta ku saabsan Berbera laakiin wali wax natiijo ahi kama soo bixin.
Waxa socda dedaallo Mareykanka, Immaaraatka iyo Yuhuuddu wadaan si ay dal madaxbannaan ugu aqoonsadaan Somaliland taas oo ay ku rabaan in ay kula wareegaan marinka istaraatiijiga ah ee Baabul Mendabka isla markaana ay kala socdaan dhaqdhaqaaqyada dhaqaale ee Baddacas iyo Gacanka Carbeed.
Mareykanka oo intii uu Trump yimi isku beddelay dal ganacsi isla markaana dalal badan doonaya in uu qaato khayraadkooda sida macdanta Yukrayn ayaa bilaabay in uu aad diiradda u saaro meeshii dhaqaale ka soo galayo.
Trump ayaa markii dib loo doortay la weydiiyey meesha ugu horreysa ee uu safarkiisa dibedda ah ku bixi doono kaas oo sheegay in haddii Sucuudigu nus trilyan bixinayo uu aadi doono.
